“ഇത്രയും കാലത്തെ ജീവിതത്തില്‍ ഒരിക്കല്‍ പോലും ഞാന്‍ എന്റെ അച്ഛനെ കണ്ടിട്ടില്ല. എനിക്കറിയാത്ത ഒരു വ്യക്തിയെ പരിചരിക്കാനായി ഞാനെന്തിന്‌ പണം നല്‍കണം? എന്റെ സ്കൂള്‍/കൊളേജ് സര്‍ട്ടിഫിക്കറ്റുകളില്‍, വര്‍ക്കിയെന്നല്ല, ജോര്‍ജ്‌ എന്നാണ്‌ അച്ഛന്റെ പേരായി എന്റെ അമ്മ നല്‍കിയിരിക്കുന്നത്‌. ഇയാള്‍ തന്റെ അച്ഛനാണെന്ന്‌ ആദ്യം തെളിയിക്കട്ടെ. ഞാന്‍ ജനിച്ചശേഷം അമ്മയെ ഉപേക്ഷിച്ച്‌ പോയയാളാണ്‌ അച്ഛന്‍. തന്നെ വളര്‍ത്തിയത്‌ അമ്മയാണ്‌.അങ്ങനെയൊരു അച്ഛനുണ്ടായിരുന്നെങ്കില്‍ അയാള്‍ എന്ത്‌ കൊണ്ട്‌ എന്റെ ഭക്ഷണത്തിനും പഠനത്തിനും, യൂണിഫോമിനും വേണ്ടിയൊന്നും തന്നില്ല?”
“എന്റെ ഈ ചോദ്യങ്ങള്‍ക്കു കൂടി ഉത്തരം നല്‍കാന്‍ മകള്‍ക്കെതിരെ കോടതിയ സമീപിച്ചിരിക്കുന്ന വര്‍ക്കിയെന്ന ഈ ‘അച്ഛന്‍’ ബാധ്യസ്ഥനാണ്‌. ബാല്യകാലത്തെ ദുരിതങ്ങള്‍ക്കും സങ്കടങ്ങള്‍ക്കും കൂട്ടായിരുന്നത്‌ അമ്മ മാത്രമായിരുന്നു. തന്നെ പഠിപ്പിച്ച്‌ വലുതാക്കിയതും ആ അമ്മയാണ്‌. അപ്പോഴൊന്നുമില്ലാത്ത പിതാവ്‌ ഇനി എനിക്ക് വേണ്ട. പറയുമ്പോള്‍ ഇയാള്‍ എന്റെ അച്ഛനല്ല, അതുകൊണ്ടുതന്നെ, ജില്ലാ കലക്ടറുടെ ഉത്തരവ്‌ ഞാന്‍ അനുസരിക്കുകയുമില്ല” - ലിസി പറയുന്നു.
താന്‍ നിര്‍ധനനാണെന്നും ഭക്ഷണം കഴിക്കാനും ചികിത്സിക്കാനും പണമില്ലെന്നും പറഞ്ഞ് മാലിപ്പാറ സ്വദേശി എന്‍ഡി വര്‍ക്കിയെന്ന പാപ്പച്ചന്‍ (65) നല്‍‌കിയ പരാതി പരിഗണിച്ചുകൊണ്ട് ലിസിയുടെ സ്വത്തുക്കള്‍ ജപ്തി ചെയ്യാന്‍ ജില്ലാ മജിസ്ട്രേറ്റ്‌ കൂടിയായ കളക്ടര്‍ പിഐ ഷെയ്ക്ക്‌ ഉത്തരവിടുകയായിരുന്നു.
മലയാളം, തമിഴ്, തെലുങ്ക് സിനിമാരംഗത്ത് പ്രശസ്തയായ ലിസിയുടെ ജന്മനാട് കൊച്ചിയിലെ പൂക്കാട്ടുപടിയാണ്. എറണാകുളം സെന്റ് തെരാസാസ് കോളേജിലാണ് പഠിച്ചത്. എണ്‍‌പതുകളുടെ ആരംഭകാലത്താണ് ലിസി സിനിമയില്‍ വരുന്നത്. സംവിധായകന്‍ പ്രിയദര്‍ശനും ലിസിയും തമ്മിലുള്ള പ്രണയം 1990-ല്‍ വിവാഹത്തില്‍ കലാശിച്ചു.
വിവാഹശേഷം ലക്ഷ്മി എന്ന് പേരുമാറ്റി ലിസി ഹിന്ദുമതം സ്വീകരിക്കുകയും ചെയ്തു. കല്യാണി, സിദ്ധാര്‍ത്ഥ് എന്നിങ്ങനെ രണ്ട് മക്കളാണ് ലിസി - പ്രിയദര്‍ശന്‍ ദമ്പതികള്‍ക്ക് ഉള്ളത്. ചെന്നൈയില്‍ അത്യാഡംബരപൂര്വം കഴിയുന്ന ലിസി സ്വന്തം പിതാവിനെ മറന്ന കാര്യം ഞെട്ടലോടെയാണ് പുറം‌ലോകം അറിഞ്ഞത്. ലിസിക്ക് സിനിമയില്‍ ചാന്‍‌സ് നേടിക്കൊടുക്കാന്‍ ലിസിയുടെ അമ്മ നടത്തിയ ശ്രമങ്ങളെ പറ്റി കുറ്റാന്വേഷണ വാരികയായ ക്രൈം സ്റ്റാര്‍ പ്രസിദ്ധീകരിച്ച ലേഖനം ഏറെ വിവാദമായിരുന്നു.
